Gizaeuropa / Joseba A. Urizar, Omar Nabarro

Bazihoan edota bazetorren 1985ko uda arin baino arinago. Ekainaren amaiera izango zen eta non eta Bilbon eta zertan eta klaseak ematen. Esan beharrik ez udaberriko garunok harrezkero bihotzean majo loditurik geneuzkala; nik neuk neskak besterik ez nuen kaleetan zehar ikusten, eta Omar lagunari ez bakarrik kaleetan zehar, liburudendetan, komunetan, euskaltegian bertan, goiz, eguerdi, arratsalde edo gauetan, Anbotoko errekastoetatik inportaturiko lamiak bailiran... eta mamu zentzu biotan zoragarriok urtzekotan zer eta, -Ginebra, Historia eta Poesia lagun-, liburu bat idaztea asmatu genuen, liburu bat eraikitzea Ekik lehortutako lur arrakalduen gainean, liburu bat elkarrekin kometitzea sargori anti-heroikoak eragindako izerditan blai.