Ihes baten lausoa / Hasier Larretxea

Hasier Larretxeak Ihes baten lausoa (Balea Zuria) poema-liburua argitaratu du. Lan horrekin Hasier Larretxeak horren ongi ezagutzen duen geografia literarioan murgiltzen gaitu beste behin ere. Geografia horren inguruko oroimen ariketa bat da liburua. Poeta iraganari aurrez aurre begira jartzen da, iragan horren lorratzak bilatzen ditu basoan. "Hitza/ harresien haustura/berri bat baino ez da/esanahiek lurra baino lehenagoko/haizeari heltzen asmatzen badute./Bizitza/bide ertzei eusten jakitea da". Mina eta poza batera doaz bidean, isilago batzuetan, ageriago besteetan. Argi-izpiek beti zeharkatzen dituzte esku ahurretako marra guztiak. Marra horietako bakoitza bide bat da, harri tanta bat, galdera bat, enborraren biribil bakoitza.