Krutwig : bere mendeurrenean berrirakurtzen

Federico Krutwig Sagredoren bizitza, pentsakera eta lanak jasotzen dituen liburua argitaratu du Nabarralde Fundazioak. 13 idazlek hartu dute parte, artikulu bana idatziz. Zergatik eta zertarako berrirakurri Krutwig bere jaiotzaren mendeurrenean? Birpentsatzeko garai hauetan, zer zarete zuek lehenago, inperialistak ala demokratak? Kolonialismorik okerrena mentala bide delako. Duela ia hirurogei urte bezalaxe, aspaldidanik lozorroan, lidergo faltan zegoen (eta dagoen) herri hau astintzera datoz orri hauek. Sinesgarria al da ustez askatasun gosez bizi den herri zahar honek bere erraietatik sortutako hainbat pentsalari sakoni bizkarra ematea? Geureak omen diren erakundeek berauek baztertu eta ezkutatzea? Halako askatasun-sortzaile asko nahi (eta behar) ditugu munduan duintasunez ibiltzeko. Gure memoria historikoa geurea eta geuretzat izan dadin, ahoz, irakurriz eta idatziz.