Mikrokosmosa : lau mila milioi urteko eboluzioa gure mikrobio-arbasoez gero / Lynn Margulis, Dorion Sagan ; [itzultzailea, Joan Ignazio Abrisketa]

Liburu honetan, bakterioek, Lurrean gertatu den prozesu ebolutiboan, izan duten berebiziko garrantzia aztertzen da. Horretarako, haiek asmatutako oinarri kimiko eta estrukturalen berri ematen digu egileak: arnasketa aerobikoa, mugimendu ziliarra, sexualitate horizontala, zelula eukariotoa... Horrez gain, gertatutako eboluzioan bakterioak bizidunen zelulen sistema estrukturalean nola integratu diren ere aztertzen da. Darwinismoaren arabera, etengabeko lehia zen eboluzioaren higiarazlea. Margulisek, hori ahaztu gabe, mikrobioen sinbiosia (elkarkidetza) maila berean jartzen du, eboluzioa azaltzeko. Margulisen ideiak, hasiera batean, ez ziren gogoz hartuak izan lankideen artean. Gaur egun, ordea, biologoak gero eta gehiago onartzen ari dira ideia horiek eta, horren ondorioz, eboluzioaren zuhaitz genealogikoa errotik aldatzen ari da.