Lizardi-ren lirika bideak / Luis Mari Mujika

Lehen ale honetan, Lizardi gerrarteko gure liriko gorenaren alde soziologiko, ideologiko, kultural eta familiarrak ukitzen dira lehenik. Gero, autorea bere lirikaren meharguneetan sartzen zaigu, bereziki Lizardiren eragin edo influxu aztarna batzuk arakatuaz. Baita aztertzen dira bertan gure olerkariaren elisio-joerak, arlo semantiko batzuen hedadurak, arlo horietako teknika literario zenbait, etab. Bigaren alean Lizardiren lirikaren azterketa tekniko hurbilago bat ematen zaigu. Olerkariaren ingurugiro soziologkoa utzirik, bertan autoreak zenbait tematika berezi arakatzen du; bestalde, teknikaren arloan bisemiak, paralelismoak, "atari sinboliko-ilogikoen" mundua, kromatismoa, paisajismo umotua, antitesiak, etab. ukitzen dira. Gehigarri edo eraskin bezala Lizardiren estrofismoa aztertzen zaigu, eta ondoren testu antologiko batzuk ematen. Lan honen bitartez irakurleak gure literaturako liriko handienetakoaren eder-mundua dastatzea ahal izango du. Testu literarioen komentario-teknika aldetik obra honek hildo berriak eta aportazio ukaezinak dakarzki. Gure literaturaren historia zenbaiten azalkeriatik ihes egiteko honelako lana beharrezkoa zen.