Ipuin bakarrak / aukera eta sarrerak, Xabier Mendiguren

Ipuingintzaren indartze eta sendotzea dugu joan den hamarkadako gertakaririk garrantzitsuenetakoa euskal literaturan: lehendik ia existitu ere egiten ez zen generoa hazi, umotu eta fruitu harrigarriak eman ditu. Bilduma bikainenak eta egile ospetsuenak aipatu beharrik ez dugu, gogoan izango ditu irakurleak izenik nagusienak, nork bere guztizkoak izanik ere. Izenburu ezagun horietatik kanpo halere, badira hainbat ale eder: aldizkarietan sakabanatuak, argitalpen instituzionalen batean ahaztuak... Ahazteko arriskua zuten egiazko perla horiei argi berria emateko asmoz, bilduma berezi hau prestatu dugu: batetik, inoiz liburururik atera gabeko zenbait idazleren ipuin bikainak, eta bestetik, egile horrek ipuin-liburuak izanik ere horietatik kanpo gelditu diren istorioak. Batera zein bestera, ipuin bakarrak, bakarrik geratuak.