Bart irakurtzeko gaur izkiriatua / Xabier Izaga

Bat-batean liburuaren izenburuak harritu gaitu, eta pentsatu dugu beranduegi ez ote gabiltzan. Berehala ohartu gara ordea, Xabier Izagaren ironiak denboraren neurriak antzaldatu nahi dizkigula, kolokan jarri gure denboraren eta munduaren paradoxa. Horregatik izan da bart irakurtzeko gaur izkiriatua. Izagak idatzitako lehen liburu hau Carabanchel, Puerto de Santa Maria eta Herrera de la Manchako kartzeletan ondutakoa da, eta egun gatibu dagoen Caceres-1ean burutua... hain zuzen ere munduaren eta denboraren neurriak trakestuta dauden lekuetan. Egoera xumeetan bilatu du atsegina, saminetan jalgi zaio zorroztasuna, ausentzian kantatu du amodioa. Bizitzari eta egunerokoari mintzo zaio, inoiz umorez eta irriz, inoiz lagunkoi baina maltzur... beti mindura ezti eta zirikatzaile batekin.