Eibarko euskeraren esakerak eta bestelako berezitasun batzuk / Juan Andres Argoitia, Nerea Azkarate, Xabier Gezuraga

Orain dela lau-bost urte, hainbat eibartar gure herriko hizkeraren berezitasunak aztertu eta biltzeko asmoarekin elkartu ginen. Denon gogoan zegoen euskerak azken urteotan bereziki izan duen etengabeko gainbehera, eta horrekin kezkatuta Eibarko euskera jaso beharraren premia ikusi genuen. Bilera haietan hartutako erabakien arabera bost talde eratu genituen: Aditza, Morfosintaxia, Lexikoa, Fonetika eta Lokuzioak. Talde guzti hauen lanak batu ondoren, Eibarko euskeraren ezaugarrien berri eukitzea zen helburua, gure mintzairaren gaur eguneko argazki bat, ahal denik eta zehatzena. Gure azterketaren muina Eibarko hizkera izan arren, hizkuntza ez eze, lehengo eibartarren bizimoduaren berri ematen duten esaldiak ere tartekatuko ditugu. Guk behintzat horien bitartez gure arbasoek mundua ulertzeko zuten filosofiaz, umoreaz eta hainbat ohiturez asko ikasi dugu.