Txillardegi hizkuntzalari [Interneteko baliabidea] / Markos Zapiain Agirre

Euskararen aldeko borrokak bete zuen Txillardegiren bizitza, maila teoriko-ideologikoan zein praktika politikoan. Aztergai izan zuen euskara. Eta, euskara hizkuntza denez, hizkuntza guztien ezaugarri komunez ere pentsatu eta idatzi zuen. Politikari abertzale eta euskalari euskaltzale gisa baldin bazaigu ere ezaguna, bada bestelako Txillardegi bat, hizkuntza lotzen diona totemismoari eta mitoari, psikoanalisiari eta inkontzienteari, erlatibismoari eta unibertsalismoari. Bestalde, egoera diglosikoan eta galbidean dauden munduko hainbat eta hainbat hizkuntzaren borroka sarritan galduak aztertu zituen, euskararen bizirauteari begira tresnarik egokienak aukeratzeko eta aplikatzeko. Gainera, jakintza mota berri bat asmatu zuen, Soziologia matematikoa, euskararen ezagutzaren eta erabileraren arteko alde mingarria zehaztasunez neurtzeko, alde hori murriztea helburu. Txillardegiren ustez, euskarak, biziko bada, ezinbestekoak ditu Estatuaren baliabideak. Bestela, hil egingo da.