Europa ispiluaren aurrean

"Europa ispiluaren aurrean" liburuan, Fortanak europarrek identitate komun bat kodifikatzeko dituzten arazoak aztertzen ditu. Historikoki Europak identitate hori "besteei" begira antolatu du, haiekiko ezberdintasunak agerarazteko. Baina, Europaren benetako historia plurala eta mestizoa da. Eta historia erreal hori, beldurrez, ukatu egiten dugu. Hasiera batean greziarrek eta erromatarrek "barbaro"aren tipologia asmatu zuten. Gero herexearen edo fedegabearen estereotipoak agertuko dira. Beranduago, zaldunen mitoen azpian, emakume eta gizonezko arrunten historia estaltzen saiatuko da. Erdi Aroan nekazari kulturgabeko irudia sortzen da, geroago "masak" etsairik handiena bihurtuz. Horrekin batera historia, gurea, lineala dela onartzen da ezbairik gabe. Beti aurrera doana, atzera begiratzerik uzten ez duena. Gaur egun, gero eta garbiago geratzen ari da, aldiz, marraztutako bidebakar hori anitza dela eta Europako historia ibilbide pluralaren elkarsartze konplexua baino ez dela.