Aro Modernoko eta Garaikideko gatazkak Ezkerraldean Aro Modernoko eta Garaikideko gatazkak Ezkerraldean

Proiektu honek hutsune bikoitza betetzea du xede. Alde batetik, Euskal Herriko historiari lotutako edukiak lantzeko orduan baliabide-eskasiaren ondorioz irakasleok ditugun arazoak konpontzeko ekarpen xumea egin nahi du. Bestetik, aipatutako hutsunea arazo-egoeren metodologian oinarritutako unitate didaktikoak landuz betetzea du helburu. Horretarako, DBHko 4. mailan Geografia eta Historia irakasgaian jorratzen den marko kronologikoaren baitan Euskal Herrian jazotako zenbait gatazka (1718ko matxinada, Karlistaldiak eta Gerra Zibila) tokikotasunetik abiatuta landu ditut, ikasleei lehen eta bigarren mailako iturrien erabileran oinarrizko trebakuntza eskaintzeko. Alabaina, landu dugun esparru geografiko zehatzaren (Ezkerraldearen) gainetik, edozein eskualdeetara egokitzeko moduko proposamen didaktikoa ondu dut; alegia, edukietan tokiko errealitatera egokituta edozein eremutan erabiltzeko moduko markoa eskaini nahi diet lankideei. Formatuari dagokionez, ikasleei unitatea aurkezteko eta klasean lantzeko, arazo-egoeraren fase guztiak modu sinplean azaltzen dituzten aurkezpen grafikoak sortu ditut. Bestalde, irakaslearen lana koordinatzeko eta unitateen helburu didaktikoak, ebaluazio-irizpideak eta ebaluazio-adierazleak zehazteko, site bat sortu dut.