Pentsamenduaren historia Euskal Herrian : eskolaren eta gogoetaren lana gizaldiz gizaldi / Joxe Azurmendi

Bilduma honek euskal pentsamendu garaikidea garatu eta zabaltzea du helburu. Joxe Azurmediren ur-jauziaren metaforak biltzen du bere asmoa. Jakin Fundazioak eta UPV/EHUko Joxe Azurmendi Katedrak lankidetzan osatu dute bilduma, Laboral Kutxaren laguntzarekin. Liburu harrigarri baten aurrean gaude. Euskal pentsamenduaren entziklopedia, azken buruan. Pentsamenduak eta eskolak gure herrian izandako historiaren ideia orokor bat eskaintzen digu liburuak, mila urte luzeri emandako gainbegiratuari esker. Euskal ekoizpen intelektualaren historia sistematikoaren ernamuina jarri digu Azurmendik begien aurrean: ehunka eta ehunka pentsalari eta idazle, jakitate esparru guztietan barna. Eta, jakina, ekoizpen horren garaian garaiko testuinguru historiko, sozial eta kulturala argitzen ere arreta berezia jarriz. Azurmendiren lan egiteko modua ezagututa, ezin zuen bestela izan. Hitz gutxitan, hamarkadatan zehar taxututako ikerketa lan entziklopediko aitzindaria dugu esku artean.