Sexua noiznahi / [egilea] Luis Elberdin

"Sexua noiznahi" liburua praktikoa da batez ere. Primateen sexualitatearekin hasten da, sexuen testuinguru ebolutiboa argitzeko. Ondoren, masturbazioari ekiten dio, eta duen garrantzia azpimarratzen du, baita bikotekidea izanda ere. Sexuarekin duten gorputzaren alde anatomikoen eta fisiologikoen berri ematen da (erekzioa, bagina, hilekoa...). Maitasun "debekatuak" beste kapitulu batean agertzen dira (lesbianak, gizon gayak, transexualak,...) eta kontrazepzio metodoak (kondoiak, piuluak, DIUak, basektomia, gizonentzako pilula, biharamuneko pilula, abortua,...). Transmisio sexualeko gaitzen artean, HIESak badu toki berezia. Jolas sexualak, nola ez, liburuaren zati garrantzitsua betetzen dute. Fantasia sexualak, orgasmoak, usain sexualak, uzkiko koitoa,... Klitoria-bagina polemikan ere sartzen da egilea; "klitoriko orgasmoen" eta "baginako orgasmoen" arteko eztabaidan, alegia. Klitoria bereziki aztertzen du, baita ospe handia hartu duen "G puntua ere".